అప్పులు హద్దులు దాటితే తప్పవు చిక్కులు

అవసరానికి తగ్గ సోమ్ము మనదగ్గర లేనప్పుడు ఇతరుల దగ్గర తిరిగి చెల్లించే ప్రాతిపదికలో సొమ్ము తీసుకోవడాన్ని అప్పుగా చెప్పవచ్చు. అప్పు అన్నది ఎప్పటినుంచో ఉన్నా గతంలో అప్పు అన్నది అందరికీ అందుబాటులో ఉండేది కాదు. అయితే నేడు అప్పు అనేది అనేక రకాలుగా మనకు అందుబాటులో ఉంది. అప్పు రూపంలో కేవలం సోమ్మే కాదు వస్తువుల దగ్గరనుంచి మరెన్నో మనకు అప్పుగా లభిస్తున్నాయి. కొన్ని సందర్భాల్లో అప్పులు మనల్ని వెతుక్కుని మరీ వస్తున్నాయి. అయితే దొరుకుతోంది కదాని మన రాబడికి మించి అప్పులు స్వీకరిస్తే చివరకు అవే మన కొంప ముంచేస్తాయి. నేటి కాలంలో వాయిదాల పేరుతో ప్రతిది అందరికీ అందుబాటులోకి వచ్చింది. దీంతో కొందరు ఆదాయానికి మించి వాయిదాల రూపంలో అప్పులు చేసేస్తుంటారు. చివరకు అన్ని రకాల వాయిదాలు కలిసి నెత్తిన పడ్డప్పుడు లబోదిబో అంటుంటారు. ఇలా వాయిదాల పేరుతోనే, మరో రూపంలోనో అప్పుల ఊబిలో కూరుకుపోకుండా ఉండడానికి ఆర్థిక నిపుణలు కొన్ని సూచనలు చేస్తున్నారు. వాయిదా రూపంలో కానీ, మరో రూపంలో కానీ ఏదైనా అప్పు తీసుకునేటప్పుడు దాని అవసరం మనకు ఏమాత్రం ఉందన్న విషయాన్ని ముందుగా ఆలోచించాలి. అలాగే ప్రస్తుతం తీసుకుంటున్న అప్పుతో కలిపి నెలవారీ మనం చెల్లించాల్సిన వాయిదాలు ఎంత అన్న విషయాన్ని ఈ సందర్భంగా పునః సమిక్షించుకోవాలి. ఇలా ఆలోచించడం వల్ల తాజాగా తీసుకోబోయే రుణం మిమ్మల్ని బాధించే అవకాశాలు తగ్గుతాయి. అలాగే వాయిదాల రూపంలో ఏదైనా వస్తువో గృహ అలంకరణ సాముగ్రినో కొనుగోలు చేసే ముందు అది తమ తాహత్తుకు తగినిదా, దాని అవసరం తమకు నిజంగా ఉందా అన్న విషయం కూడా ఆలోచించాలి. ఎందుకంటే మనకొచ్చే ఆదాయాన్ని బట్టి మన ఖర్చులు, హోదాలు ఉన్నప్పుడే జీవితం సాఫీగా సాగిపోతుంది. అలా కాక ఆదాయాన్ని మించి ఖర్చులు ఉంటే బరువెక్కిన ఓడలా బ్రతుకుబండి సైతం ఎప్పుడో ఒకప్పుడు మునిగిపోక తప్పదు. అందుకే వాయిదాల రూపంలో తీసుకునే అప్పుల విషయంలోనూ జాగ్రత్త వహించక తప్పుదు. మొత్తంగా చెప్పాలంటే మీ ఆదాయంతో పోల్చినపుడు మీ వాయిదాల చెల్లింపు నిష్పత్తి 30 శాతానికి మించకుండా ఉన్నప్పుడే మీరు అవసరానికి మాత్రమే అప్పుల వైపు చూస్తున్నారని అర్థం. అలాంటి పరిస్థిలో మీ ఆర్థిక స్థితి ఉంటేనే మీరు జీవితంలో ఆనందంగా ఉండగలరు.